گەریدەیێن تێکدەر

گەریدەیێن تێکدەر

سەردار هێتوتی

گەریدەیێن تێکدەر، نە رامان ئەو کەسن یێن ل ئەوروپا و د دەمێت بووری دا هاتی و سەرەدانا کوردستانێ دای و دیرۆک نڤیسی، هەر چەندە وان ژی بەهر د تێکدانا دیرۆکی دا هەیە، لێ ل ڤان رۆژێت بووری زێدە وێنە کەفتنە دناڤا تورێن جڤاکی دا کو ب راستی یێن دلئێش بوون.
گەریدەیێن مە ب ناڤا گەشتوگوزار و توریزمێ یێ سەرەدانا جهێت گۆزاری دەن و تێر خۆشیێ ل وان دیمەنێن بەهەشتێ وەردگرن و پاشان ل دویڤ خۆ گیفکێ گلێشی بجهـ دهێلن و قەستا مالێت خۆ دکەن.
ل سەر ئەکرانا ڤان تووران شکل و وێنێت تژی پیساتیا دلێ قرێژگرتیێ هندەک سەیرانچیان دیاربوو، وان کەسان پلاستیک و بەرمایکێت دیتر ب زێدەهی ل پاش خۆ هێلابوون و قەستا ماڵ کربوون.
ل ڤی وەڵاتی مە گەلەک قەیران هەنە لێ قەیرانا هەرە مەزن یا نەبوونا هشیاریا تاکە ل هەمبەر ئەرک و مافان و ب تایبەت وان ئەرکێت لسەر ملێ تاک لهەمبەری ژینگەهێ، ئەو وەسا ددەن دیارکرن کو دڤێت حکومەت هەمی کاران بکەت ژ بۆ پاراستنا ژینگەهێ لێ ژبیر کریە کو دڤێت ئەو بخۆ یێ پێگیربیت ب پاراستنا ژینگەها ڤی وەڵاتی.
ئەگەر هوسا برێڤە بچیت، دێ د دەمێت نێزیک دا ماڵوێرانیێت مەزن بینین کو ب دەستێ تێکدەران ل سەر دار و ئاڤ و ئاخ و هەوایێ ڤی وەڵاتی دا دهێت و جهـ بۆ ژیانەکا ساخلەم دێ بەرتەنگ بیت، لەوا ب هەر بەهایەکی بیت و ب تاقیکرنا هەر رێکەکێ بیت دڤێت لایەنێن پەیوەندار بلەز ڕێگیریێ ژ ڤان کریارێت تێکدەرانە و پیسکرنا ژینگەهێ بگرن و کار بۆ هشیاریا تاک و جڤاکی بهێتەکرن و گرنگیا پاراستنا ئەرد و ئاڤ و ئاخا کوردستانێ دڤێت ژ فەرکاران بیت.